* بالنسبه للصحبات : اللى تتمسكن لك و ترسم وش العطف و تقول لك "معلش" ..ولا تبصى فـ وشها تانى ..عادى يا بناويت بتحصل وكلنا عارفين و لا نطلع من الارشيف ؟؟
* بالنسبة للعيلة المحترمة : على رأسى بس اللى عاوزه تجاملك متروحش تقلب المواجع على الست الوالدة ـ اصلى عارفه الضرب اللى من تحت الحزام ده ـ و اللى عاوزة تدعي لك ..تدعى بظهر الغيب متجيش فى وشك و تستعبط و الحديث
لرجاله العيله ..الجدع فيكم يجيبلها وظيفة .
* بالنسبة للناس العادية: من خلال تجربتى فى الحياة ـ آه تجربتى فى الحياة عندكم اعتراض ـ نستنتج حاجتين
( 1_ اللى عاوز بجد حاجة بيعـــملها و على رأى اوباما Yes, We can /
2- فى شوية كائنات حية بيضحكوا علينا و يسموا نفسم بنى ادمين لازم يوردوا علينا عشان نتعلم اومال هنتعلم من مين!) لذلك محدش يضحك عليكى و يفهمك انك السبب فى هلاك الكرة الارضية..
* بالنسبة لى : ممممممم مفيش جوايا غير كلمتين (الطيبين غاليين عند ربنا) لذلك اوعدى نفسك ان مهما حصل مفيش حاجة تغير طيبتك و بياض روحك لان مفيش غير ربنا اللى بيسترها معاكى ... وانا هنا اقصد الطيبه مش الهبل يا اختى منك ليها .
* بالنسبة لأى حد وجعك : اعترفى بالوجع و بالاذى حتى لو كان اللى وجعك هيحس بالانتصار عليكى ساعتها ..مجرد اعترافك بالوجع هو اول خطوة انك تخففيه و افتكرى (انتى اتوجعتى بس لسه فيكى الروح وطالما فيكى الروح كله بيروح )و بالنسبه بقى لـ للكائن الخرشوفى اللى وجعك اؤكد لك انه هيبقى يوم مكانك وانتصارك عليه ان يوم ما يفتكرك ان اللى حصل له ده بسبب ظلمه ليكى يلاقيكى عايشه و فله شمعه منورة ......
آه حاجة كمان اخيرة : اضحكى وافردى بوزك مهما كنتى فاكرة انك زعلانة..لان حجم خيبتك مش قد جمال ضحكتك لما تفرد وشك و تفتح قلوب الناس ليكى .
------
ربنا يجعل كلامنا خفيف عليهم
حورية
كلمتين ف ضميرى 1
http://horeyaat.blogspot.com/2012/08/blog-post_27.html
