الاثنين، 27 أغسطس، 2012

كلمتين فـ ضميرى (يارب ما أعنس )

فكرة ناس كتير عن الجواز بالنسبة لى مملة ..
لانها بتنحصر فـ الشقة و الجهاز و المتقدم الجاهزاللى عنده دخل ثابت 
(باختلاف الطبقات و المستوى) ..
      قمة الملل بقى انها بتخلى الشباب و البنات و حتى البيوت نموذج واحد 
يعنى مثلا كل البيوت لازم يبقوا عندهم نفس نظام الاثاث "العفش" :) مفيش اختلاف لدرجة ان فى بيوت تدخلها تحس انك داخل متحف
 و بيوت تحس انك داخل معرض موبليا 
و بيوت تدخلها تحس انها مفيهاش روح ..
فين ذوق الناس اللى فيها و روح المرح ولا  البساطة و لا الابتكار !!!! 

      شخصياً .. مبحبش المسمى بالسفرة و النيش على رغم اهميته لدى البعض انما ليه مثلا ميكونش الاولوية لبلكونة حلوة مليانة زرع اخضر جميل و فيها كراسى مريحة و تربيزه مناسبه لذوقنا...
نيجى بقى للبنات كتير منهن اصبح تفكيرهن يتلخص فى  (يارب ما اعنس ) بغض النظر عن  حاجات تانيه اهم و فى بنات بتتبرمج ان اهم حاجة الفلوس و المادة و فى بنات بتحسبها( انا عايشه كده فى بيت اهلى احسن ) و الجواز بالنسبه لها حسبه غلط و ده إلا ما رحم ربى عشان منظلمش بنات بتفكر صح و بتختار شريك حياتها صح رغم كل الظروف المحيطة ...
و بالنسبه للشباب انا مش احسن من يتكلم عنهم لكن فعلا انا اشفق عليهم او بمعنى اصح عن الكويسين منهم اللى عنده احلام و طموحات و نفسه يحب و يرتبط زى اى بنى ادم و ده الجديد بالنسبه لى - عرفته مؤخراـ ان هما كمان بيبقى نفسهم يحبوا و يرتبطوا و بيخافوا ليعنسوا زينا ـ ومفيش حد احسن من حد ـ بس تركيبة تفكيرهم مختلفه شوية ..
الشباب دول بشفق عليهم لان الجد منهم بيلاقى نفسه محاط بكمية مظاهر و شكليات و ماديات مقيتة و رخمة و مملة و بتتواضع اهدافه فى الحياة إلا ما رحم ربى برده عشان منظلمش ..و فى صنف تانى بيعيش حياته مقضيها و بيكتشف انها ضاعت فى الاخر ..

خلاصه الكلام: اننا بنسمح للاشياء ان يكون لها الافضلية قبل البنى ادمين و بنقتل روح الابتكار و التجديد فى نفوسنا و فى بيوتنا و مجتمعنا  ..و بننسى ان الاشياء اتعملت عشان تخدمنا مش عشان تتحكم فينا .
 ____
كانت معكم حورية محمد..
و احدى الافكار التى خبطتنى فجأة كدهوو قلت لنفسى
يارب ما اعنس :)

هناك 4 تعليقات:

  1. وان كمااااااااان
    انا تقدري تقولي كدا اني من البني آدمين اللي هما "مارحم ربي دول :)"
    ..
    وفكرة حلوة كدهوون :)

    ردحذف
  2. غلو المهور و الكماليات الغير مهمة
    هي اللي خربت بيت الشباب و خلتهم يعرضوا عن الجواز
    بوست هايل

    ردحذف
  3. اوافقك جدا كلام مهم يارب نستعمله اصلا

    ردحذف
  4. كلامك صح ياحورية فعلا بنات بقت متبرمجة على المادة وبنات بقت تقول يارب ما اعنس يعنى تقبل بأى عريس والسلام بدل من لقب عانس ودة موضوع منتشر كثيرا
    وبعدين الموضوع اكبر بكتير من نظرة الماديات
    الموضوع دلوقت محتاج ان اهل العروسة ميغالوش فى طلباتهم ويراعوا ظروف الشاب
    وللأسف فية ناس كثيرة نسوا الحديث الشريف( اذا جأكم من ترضون دينة فزوجوة )
    وبعضذ الصحابيات كان مهرها سورة من القرآن

    ردحذف