الخميس، 14 يونيو 2012

العودة للمنار







ــ لا أوعي تقولى أنك مش هتخديها معاكي
ــ مينفعش أخدها معايا فى وقت زي ده وبعدين متخفش مش هتعضك دى بنتك
 ــ ايوه عارف انها بنتى بس معرفش اذا كانت بتعض ولا لا
ابتسمت زوجتنا المصون ابتسامه صفرا بعد ما ضيعت عليا ليله يوم الاجازة اللى بستناها عشان اقضى السهرة مع الصحبة بحجه ان الست حماتى تعبانه ولازم تروحلها طبقت ورقة وحطتها فى ايدى وقالت دى فيها مواعيد الاكل و الدوا .. مقدرتش احدد كويس هى قالت ايه بالظبط  بعد ما رزعت الباب وراها "يلا سلام " او" يلا سلاحف" الساعه كانت تسعة وانا قدام التليفزيون متحركتش إلا لما حسيت برعشه برد خفيفة وحطيت ايدى فى جيب البيجامة لقيت ورقه ... يا خبر نسيت منار)عشى البنت واديها دوا البرد من العلبه البيضا اللى فيها خطين خضر ( كانت دى أول ملحوظه فى الورقه و الغريب انها وصفتلى شكل علبه الدوا وكأنى مش هعرف اقراها لو كتبت اسم الدوافتحت باب الاوضه براحه علشان لو البنت نايمه متصحاش ويجى وجع الدماغ على اهون الاسباب لقيت حاجه صغيرة فى نص الاوضه متكومه ،ايوه تقريبا دى بنتى
ــ مساء الخير يا منار
ــ بااااااباااااا جريت عليا و اتشعلقت فى رجلى.. يلا تعالى العب معانا .. شدتنى من ايدى و لفت تكلم لعابها :
ده الحمار... ده الحمار اللى هيوصلنا للمزرعة
ــ يلا يا منار عشان تتعشى وكملى لعب بعدين
ــ لا يا بابا وحياتى وصلنا للمزرعه الاول اصلنا تايهين من الصبح والليل قرب يجيى
ــ على آخر الزمن بقيت حمار هه هه  لا ابداً
لقيت وشها اتقلب والبوز اياه فكرنى بأمها وشاورت على الارض بصبعها وقالت  :يلا يا حمار ... وصلنا للمزرعه . وفى لحظة لقيت نفسى حيوان من ذوات الاربع بلف بالهانم وصندوق لعابها الاوضه
ــ  كفايه لف بقى ؟          ــ لا يا بابا نلعب شويه كمان دول مبسوطين قوى
شديتها من دراعها .. كفايه كده لازم تتعشى وتنامى وبعدين انا مش ناقص وجع دماغ
ولسه هتبدء نويه عياط مصحوبه بزوابع و اتربه : لاااا لااااااااا اهـــــــــــى لقيت الدنيا عتمه وكل حاجة بقى لونها أسود فى عنيا ... ده مش يأس دى الكهربا قطعتولو كان يأس كان أرحم لانى من يومى وانا بخاف من الضلمة وبتجمد مكانى بسبب الهواجس والخيالات اللى بشوفها وبرغم من سنى ده إلا انى لسه بترعب من الضلمه لحد دلوقت فما بالكم وانا بقى مع ست الكل دى
ــ ايه اللى حصل يابابا?
ــ الكهربا قطعت يا منار والدنيا ضلمة                           ــ طيب كويس اننا وصلناهم المزرعه بقى
ــ ده وقته انتى كمان , تعالى نشوف الست مامتك شايله الشمع فين? . مسكت ايدها وبدأت اخطى براحه واتجاهل الخيالات المرعبه : مش لاقى شمع... مش عارف فين؟
ــ وفيها ايه لما منلقيش شمع؟
ــ هنفضل فى الضلمه
 
ــ وهى الضلمه وحشه يا بابا؟
معرفتش ارد ولقيت نفسى بخدها على اوضتها من غير ما انطق بكلمه ووصلتها للسرير
قلت:هى مش وحشه قوى يعنى بس الانسان فيها بيبقى عامل زى السفينه اللى تاهت فى البحر بليل و مفيش منارة تدله على الطريق هه هه ههه ضحكت ضحكة بريئه : أنا المنارة
ــ ايوه شوفتى انتى اللى بتنورى... معلش خلينا هنا لحد ما الكهربا ترجع
قامت من جانبى بسرعه؟ منار رايحه فين؟ منار !!!حاولت الحقها بس معرفتش شلتنى الرهبه جوايا... منار تعالى هنا ,انا بقول تعالى هنا روحتى فين؟مسمعتش رد لمدة عشر دقايق عشتهم خوف كأن المفعوصه دى هى كانت شغلانى عن كل خوفى وعجزى
ــ اهى يا بابا الشمعة               ــ لقتيها فين دى؟
ــ دى شمعه عيد ميلادى تيته قالتلى شيليها ذكرى عشان بعدد سنين عمرى
ــ اه فاكر اليوم ده                   ــ لا انت مكنتش موجود كان عندك شغل
اخدتها فى حضنى ولقيت نفسى ببكى وانهنه زى العيال الصغيرين وبالرغم من انها اتخضت من تصرفى بس لقيتها بتتطبب عليا و تهدينى
ــ متخفش يا بابا النور زمانه جى شايف الحيوانات فى المزرعه حلويين ومش بيعيطوا أزاى
وأفتكرت الملحوظه التانيه والاخيرة من الورقه :
)
ارجوك عامل منار بطبيعتك وحاول تتجاهل انها عمياء هتلاقيها طفله عاديه جدا    ..          (تمت

حورية

هناك 8 تعليقات:

  1. :)

    انا مبسوطة اني لاقيت هنا...
    ومبسوطة بالقصة ديه جدا...ساعات البراءة بتخليكي تبتسمي غصب عنك..والاطفال هم هم الاطفال مهما كانت ظروفهم او حالتهم

    ردحذف
  2. إيه الجمال ده
    تحفة بجد

    ردحذف
  3. بجد القصة جذبتنى من اول سطر وعشت معاها وكانى والد الطفلة منار بس فى النهاية وقفت امام عبارة

    )ارجوك عامل منار بطبيعتك وحاول تتجاهل انها عمياء هتلاقيها طفله عاديه جدا
    وقفت امامها ولم استطيع النطق ولكن تأكدت ان الاطفال يتعاملون بطبيعتهم البريئة التى لا ترى سوى الاشياء الجميلة وتتمسك دائما بالامل
    ابدعتى ياحورية بجد

    ردحذف
  4. رضوى : انا مبسوطة اكتر بمرورك و ردك .. القصة دى بالذات غالية عندى و البراءة اللى فيهامستوحاه من طفلة بجد ..
    اشكرك عزيزتى

    ردحذف
  5. ميرووو:شكرااا كتير لذوقك سعيده انها عجبتك

    ردحذف
  6. موناليزا : انتى الاجمل .. شكرا لطلتك الجميلة لا تحرمينى منها

    ردحذف
  7. retal : الاطفال بالذات بيتعاملوا بطبيعتهم لانهم لم يتأثروا بعد بالاهتمام بالمظاهر الى نهتم بها اكثر عندما نكبر..ننسى ان الجوهر هو الاهم و الاجمل ..شكرا لكلماتك الطيبة و تشجيعك :)

    ردحذف