الأربعاء، 27 يونيو 2012

بيتنا ... بــ تلات شبابيك

بيتنا ... بــ تلت شبابيك
شباك ضحكة
شباك ضى
شباك ليك..

بنت بتلعب ويا بنات الحى
تخطف روحها ضى عينيك..
بنتنا ..بنتك ..
طبعك
شكلك
صوتك
روحك
حتى الحسنه اللى فـ دقنك

طب طول غيبتك وهـ اوريك
راح اعلق بنتك عالحيطة
صورة و تذكار منك فيك

بيتنا ... بــ تلت شبابيك
شباك ضحكة
شباك ضى
شباك ليك..
قلبى بيتعلق فيه يناديك

تعرف؟
نفسى ازرع فـ الشباك وردة
بدل الصبارة و اشواكها
تعرف؟
بتغيظنى الصبارة
بتقولى غيابه بيسقينى

يارب مـ المر ما يسيقك
ما تشمت فيا الصبارة
عـ الباب بكره القيك

يا سلام وقتها
ولا احضان الدنيا بتكفيك
راح ادوب تلج غيابك واموت فيك
لا ..
ما اموت فيك
راح اعيش فيك
راح اسكن حضنك بيت مليان شبابيك
لكن الى ذاك الحين
بيتنا بـ تلت شبابيك
شباك ضحكة..
شباك ضى ..
شباك ... ليك

----
حــــــــــورية

هناك 3 تعليقات:

  1. ما اموت فيك
    راح اعيش فيك
    راح اسكن حضنك بيت مليان شبابيك
    لكن الى ذاك الحين
    بيتنا بـ تلت شبابيك
    شباك ضحكة..
    شباك ضى ..
    شباك ... ليك

    جميلة جدا

    ردحذف
  2. اجمل كلام شعر احساسه عالى من اجمل واحدة ربنا يكرمك يااااارب
    الكلام خارج من القلب غلى فكره

    ردحذف